争霸逆转！国米输波折将 拿玻里赛程有利

xcy232323

意甲争标形势逆转！榜首国际米兰喺周一(21日)凌晨，作客0比1不敌博洛尼亚，依家仅凭得失球压倒同得71分嘅拿玻里，但拿玻里剩低赛程更加有利，国米衞冕陷入大危机！
国米喺欧联杀入4强，球员激战後表现下滑，今场作客只得1次中目标攻门。博洛尼亚攻势较盛，但入肉埋门唔多，最後喺补时4分钟靠柯苏连尼神来之笔，禁区内巧妙勾射破网，助博洛尼亚赢1比0。
国米输波之余，仲有巴斯东尼同米希达利恩拎到黄牌，「够数」要喺下轮联赛对罗马停赛，教练施蒙尼恩沙基赛後表示：「我哋要接受现实同保持冷静，因为联赛仲未完结。」
意甲只剩5轮，国米同拿玻里依家同分，但国米仲要兼顾意盃同欧联战线，到季尾几乎都系1周双赛，反而拿玻里就专心意甲争霸，而且国米最後5轮仲要对罗马同拉素，而拿玻里最後对手，排名最高只系第10位嘅拖连奴。