森林「大锁匙」交伊度 力斟巴西神锋

xcy232323

诺定咸森林今季成为英超神奇球队，下季有机会出战欧联，希腊班主马连拿基斯亦准备大展拳脚，据报前阿仙奴总监伊度已接近加盟，将会执起森林发展嘅「大锁匙」，而佢嘅头号目标，就系用破纪录转会费收购巴西前锋马菲奥斯根夏。
伊度上年底突然离开阿仙奴，「冷河期」喺今个月初结束，一直有传佢已答应加入森林班主马连拿基斯嘅足球集团。森林上场联赛对爱华顿，伊度亦系座上客之一，领队纽奴亦唔避讳表示：「我同总监合作冇问题，之前我教嘅球会同系咁，我已经同伊度、班主、球探倾过，一切都好正常。」
马连拿基斯嘅足球集团拥有诺定咸森林、奥林比亚高斯同葡超嘅里奥艾维等球队，消息指随住森林成绩突出，马连拿基斯对森林嘅投资亦会加大。报道指伊度对巴西同胞马菲奥斯根夏非常赏识，将呢位狼队前锋列为头号目标，并考虑开出破球会纪录嘅6,000万镑收购，希望可以击退一众豪门嘅争夺。