史上最强维拉！「管理员」麦甘尼担心被删除

xcy232323

阿士东维拉近年成绩起飞，今届重返欧联即杀入8强，冬季转会窗更引入拉舒福特、马高阿辛斯奥等球星，负责做维拉「群组管理员」嘅约翰麦甘尼表示，依家嘅维拉阵容系「史上最强」，担心终有一日要将自己喺群组「移除」。
麦甘尼喺2022年谢拉特委任做队长，佢亦系球员通讯群组管理员，佢早前受访表示：「依家个阵容可能系史上最强，将咁多大牌球星加入群组感觉好特别，过去5年我谂加入咗50个球员，又移除咗50个球员，最近入Group嘅系拉舒福特、马高阿辛斯奥同唐耶尔马伦呢种级数，对球会系好事。」
苏格兰国脚麦甘尼指维拉已脱胎换骨：「依家嘅球员都想效力维拉、想踢欧联，我哋依家嘅任务系维持呢种高水平，希望之後会有更多球星希望加入维拉，或者应该希望新球员唔好太劲，我唔想有一日要将自己喺群组移除。」